🟥 العمده الصادق الشريف مرغني يكتب: العدل أساس الملك.

بسم الله الله الرحمن الرحيم

يا أهل السودان

البلد دي ما بتنهض بالسلاح ولا بالقروش ولا بالشعارات

البلد دي بتنهض بالعدل

العدل هو الميزان اللي ربنا قام بيهو السموات والأرض

قال تعالى ﴿لَقَدْ أَرْسَلْنَا رُسُلَنَا بِالْبَيِّنَاتِ وَأَنزَلْنَا مَعَهُمُ الْكِتَابَ وَالْمِيزَانَ لِيَقُومَ النَّاسُ بِالْقِسْطِ﴾

70 سنة حكم بالمحسوبية والجهوية والرشوة

القوي ياكل الضعيف

والقريب ياخد حق البعيد

والنتيجة بلد منهارة وثقة معدومة بين الناس والدولة

الظلم يخرب العمران

قال تعالى ﴿وَتِلْكَ الْقُرَىٰ أَهْلَكْنَاهُمْ لَمَّا ظَلَمُوا﴾

تشوف البلد فيها خير لكن الظلم ياكل الخير

المزارع ما يزرع عشان حقه مسروق

التاجر ما يشتغل عشان الجبايات بتاكلو

والموظف يرتشي عشان مرتبه ما بكفي

العدل يجيب الأمن والبركة

عمر بن الخطاب رضي الله عنه حكم بالعدل

فالذئب يرعى مع الغنم

والناس نامت آمنة في بيوتها

والبيت المال فاض وما لقى زول ياخد الزكاة

العدل في القضاء

القاضي ما يخاف من الوزير ولا من القبيلة

يحكم بكتاب الله وسنة نبيه

والقوي والضعيف قدامه سواء

العدل في توزيع الثروة

ما يكون الدهب في جهة والبترول في جهة والمواطن جعان

كل زول ياخد حقو

والمال يرجع للمواطن في صحة وتعليم وخدمات

العدل في المعاملة

ما يكون في مواطن درجة أولى ومواطن درجة عاشرة

كلنا سودانيين قدام القانون

والقانون فوق الجميع

لو رجعنا للعدل الشرعي

الناس بترضى والقلوب بتتألف والبلد بتتعمر

لأنو العدل يغني عن ألف خطاب تنموي

قال تعالى ﴿إِنَّ اللَّهَ يَأْمُرُ بِالْعَدْلِ وَالْإِحْسَانِ وَإِيتَاءِ ذِي الْقُرْبَىٰ﴾

اللهم ارزقنا حكاماً يحكمون بالعدل وارزقنا شعباً يقيم العدل في نفسه وأهله.