🟥 العمدة الصادق الشريف يكتب: كيف ترجع هيبة المعلم *المقال رقم 7 *
كبسون نيوز: حيث الخبر
المعلم زمان كان اب قبل ما يكون استاذ
الطالب يهابو والاهل يحترمو والشارع كلو يقيف ليهو احترام
اليوم المعلم بقى اخر زول الناس بتسمع كلامو
ضاعت هيبتو وضاع معاها الجيل كلو
اولا الاهل لازم يرجعو يقدرو المعلم
زمان امي تقول لي المعلم ابوك التاني لو ضربك ما تبكي
اليوم الاب يجي المدرسة عشان يعارك المعلم قدام التلاميذ
كيف الطالب يحترم استاذو وابوه كاسر كلامو قدامو
الاهل لو ما رجعو سند للمعلم عمرنا ما حنبني جيل محترم
ثانيا المدرسة لازم تحمي المعلم ما تحاسبو بس
المعلم البشرح بضمير يتعب وبجتهد لازم نقيفو معاهو
ما نقيف مع ولي الامر الغلطان عشان خاطر الرسوم
المعلم لما يحس انو براهو وادارة المدرسة ضد و الاهل ضد
حيقيف من الشرح وحيتحول لموظف دفتر بس
ثالثا انا ضد اضراب المعلم جملة وتفصيلا
الاضراب بضيع الطالب وبكسر ظهر التعليم
مطالبك حقك طالب بيها لكن ما توقف عجلة الاجيال
الطالب المسكين هو البضيع في النص لا ذنب له
رابعا الدولة والمجتمع لازم يرفعو مكانة المعلم
ونضرب امثلة للدول النهضت بالتعليم
اليابان بعد الحرب العالمية الثانية قالو نبني الانسان قبل الحجر
كانو بقدرو المعلم اكتر من الوزير
المعلم في اليابان عندو بطاقة بتعبر بيها اي شباك في الدوائر الحكومية
وعندو اولوية في المستشفى وفي المواصلات وفي كل مكان
ماليزيا مهاتير محمد قال اول قرار حبني بيهو البلد هو تقدير المعلم
خلا المعلم اعلى راتب في الدولة وخلا ليهو هيبة قدام المجتمع
ونحن عارفين وضع الدولة في المرتبات
لكن اقل حاجة ادوه وضعيتو العامة قدام الناس
مثلا في خدمات الجمهور يكون عندو نافذة خاصة للمعلمين
مثلا في المستشفيات الحكومية يكون عندو اولوية في العيادات
مثلا جاي يطلع جواز جاي يعمل اجراء ادوه الاولوية
الامم البنت ما بنتها بالقروش بنتها باحترام المعلم
خامسا الطالب لازم يتربى على الاحترام قبل العلم
نعلمو يقول يا استاذ قبل ما نعلمو 2 زايد 2
نعلمو يقيف لما المعلم يدخل قبل ما نعلمو الجبر
الاحترام لو ضاع العلم ببقى حشو في الراس ساي
فان اردنا هيبة للمعلم
فليرجع الاب يقول للمعلم اكسر وانا بجبر
ولترجع الادارة تقول للمعلم نحن معاك في الحق
ولترجع الدولة تقول للمعلم انت باني الاجيال ونكرمك
وليرجع الطالب يقول للمعلم على راسي وعيني
ولنقول للمعلم اطلب حقك لكن ما توقف تعليم
فوالله لو رجعت هيبة المعلم رجع التعليم
ولو رجع التعليم نهضت الامة كلها
السلسلة مستمرة
